Sindikata botërore e futbollistëve e kritikon Bayernin, për deklaratat shokuese rreth Jamal Musialas

Sindikata botërore e futbollistëve, FIFPRO, ka shprehur shqetësimin për komentet e drejtuesve të Bayern Munichut rreth kontratës së Jamal Musialas, duke shtuar se klubi gjerman “duhet të dijë më mirë”.

Musiala ishte rrëzuar dy herë brenda katër ditësh gjatë fazës përgatitore parasezonale, ndërsa reprezentuesi 23-vjeçar i Gjermanisë kishte bërë të ditur se ishte diagnostikuar me “kriza të mungesës së vetëdijes, lehtësisht të trajtueshme, të cilat shkaktohen nga një mosfunksionim neurologjik”.

Presidenti i nderit i Bayern Munichut, Uli Hoeness, deklaroi në fillim të këtij muaji se Musiala mund të mos e “rikthejë kurrë nivelin e paraqitjeve që kishte dikur”.

Drejtori ekzekutiv i klubit bavarez, Jan-Christian Dreesen, gjithashtu ka vënë në pikëpyetje kontratën e majme që sulmuesi nënshkroi në vitin 2025, e cila është e vlefshme deri në vitin 2030, në rast se Musiala nuk arrin të rikthehet në formën e tij më të mirë.

Ndërkohë, paraardhësi i tij në këtë pozitë, Karl-Heinz Rummenigge, ka sugjeruar se marrëveshja mund të ketë nevojë të rinegociohet.

“Presidenti i nderit, drejtori ekzekutiv dhe ish-drejtori ekzekutiv i Bayern Munichut kanë vënë publikisht në pikëpyetje kontratën e Musialas, njëri pas tjetrit dhe brenda një periudhe të shkurtër”, thuhet në deklaratën e FIFPRO-s.

“Në vlerësimin e FIFPRO-s, kjo është një strategji e koordinuar për të ushtruar presion ndaj Musialas dhe përfaqësuesve të tij përpara çfarëdo negociatash. Një klub me reputacionin e Bayern Munichut duhet të dijë më mirë”.

Musiala, i cili iu bashkua Bayernit në vitin 2019 pasi ishte zhvilluar në akademinë e Chelseat, u aktivizua pas 70 minutash në barazimin 1-1 ndaj Kolnit të premten, duke bërë paraqitjen e tij të parë që nga shënimi i golit në fitoren 7-0 kundër Union Berlinit më 18 shtator.

Ai ka regjistruar pesë paraqitje për klubin këtë sezon, duke shënuar dy gola dhe dhuruar një asistim.

“Bayern ka detyrimin të kujdeset për Musialan”, shtoi FIFPRO.

“Në të gjithë futbollin profesionist, pasiguria rreth të ardhmes së një lojtari mund të ndikojë në shëndetin e tij mendor, veçanërisht kur ai është duke u rikuperuar nga një lëndim. Bërja e shëndetit dhe së ardhmes së Musialas çështje të debatit publik vetëm sa e shton këtë presion. Çdo shqetësim rreth kontratës së tij duhet të diskutohet privatisht me të dhe përfaqësuesit e tij. Kontratat duhet të respektohen. Një lëndim apo rënie e formës nuk i jep klubit asnjë arsye për të rihapur kushtet për të cilat ka rënë dakord, ashtu siç një seri paraqitjesh të jashtëzakonshme nuk i jep automatikisht një lojtari të drejtën për rritje page”, thuhet tutje.

Rikthimi i Musialas në skuadrën e Bayern Munichut ndodhi në të njëjtën ndeshje në të cilën sulmuesi i Anglisë, Harry Kane, pësoi një lëndim në kyçin e këmbës dhe më pas u konfirmua se do të mungojë “për muajt e ardhshëm”./GazetaExpress/

The post Sindikata botërore e futbollistëve e kritikon Bayernin, për deklaratat shokuese rreth Jamal Musialas appeared first on Gazeta Express.

Original post Here

News
ASK publikon statistikat – Rritet numri i lindjeve dhe shkurorëzimeve, bie ai i martesave

Agjencia e Statistikave të Kosovës ka publikuar të dhënat preliminare në baza mujore për Lindjet, Vdekjet, Kurorëzimet dhe Shkurorëzimet për muajin Shtator 2026. Nga ASK bëhet e ditur se, ka pasur më shumë lindje në muajin Shtator 2026 se sa në Gusht 2026. Në publikim shtohet edhe se, në muajin …

News
Maleni e barazon rekordin e Romës me 26 gola në vitin 2026, duke tejkaluar Kane dhe Mbappe

Donyell Malen ka barazuar një rekord 66-vjeçar të Romës, pasi katër golat e tij në fitoren 5-1 ndaj Parmës e çuan në kuotën e 26 golave në Serie A gjatë vitit 2026. Sipas “Opta”, i vetmi lojtar tjetër i “Giallorossëve” që ka shënuar më shumë se 25 gola në kampionat …

News
Scott McTominay e shpëton Napolin, ia jep tri pikë ndaj Torinos

Napoli ka shënuar fitore të rëndësishme 1-0 ndaj Torinos, në kuadër të Serie A, duke i dhënë fund rrezikut për të barazuar tri ndeshje radhazi në shtëpi. Pas një pjese të parë me raste të shumta, por pa gola, Scott McTominay vendosi ndeshjen në minutën e 73-të. Mesfushori skocez realizoi …